თავისუფლება გვინეა–ბისაუში

აფრიკის დასავლეთ ნაწილში მდებარე გვინეა-ბისაუს სახელმწიფოს ხშირად ეძახიან მსოფლიოში პირველ ნარკო-ქვეყანას. გვინეა-ბისაუს მოსახლეობა ერთ-ერთი უღარიბესია და შავ კონტინენტზე ყველაზე დაბალი მშპ მაჩვენელი აქვს. ქვეყნის უკიდურესმა სიღატაკემ, გაუგონარმა კორუფციამ და ნათესაურმა სიახლოვემ სამხრეთ ამერიკის ქვეყნებთან (გვინეა-ბისაუ ყოფილი პორტუგალიური კოლონიაა) ხელი შეუწყო ევროპაში მიმავალი კოკაინის უმეტესი ნაწილის აქ თავმოყრა-აკუმულაციას.

ამ ყველაფერს ალბათ ვიკიპედიაშიც გაეცნობოდით, ჩემი ყურადღება ჟურნალ Time-ში ამოკითხულმა სხვა ფაქტმა მიიპყრო. გვინეა-ბისაუს ციხეების პატიმრებს აქვთ ნება დართული ყოველდღე 14:00-დან 18:00 საათამდე დატოვონ საპყრობილე და თავისუფლებით დატკბნენ. თუ პატიმრები დათქმულ დრომდე არ დაბრუნდებიან, მათ ძებნას არავინ არ შეუდგება და ამისთვის ისინი არ დაისჯებიან. თუმცა გვინეა-ბისაუში ბავშვმაც კი იცის, რომ პატიმარი აუცილებლად დაბრუნდება. მიზეზი მარტივია, ციხის გარდა არ არსებობს ადგილი, სადაც დღეში ერთხელ უფასო სადილს შემოგთავაზებენ.